政壇：唐唐遊南美玩埋南極

喺特首選舉輸咗嘅唐唐變得好輕鬆，經常周遊列國旅行散心。佢早前先去完歐洲幾個月，據聞佢早兩星期又再出發，今次原來係去南極睇企鵝。今次南美之旅，據聞佢兩公婆會由巴西開始一路玩落去阿根廷，最尾一站先到南極，好似話玩足個幾月先會返香港。雖然南極呢啲極地天氣好寒冷，但睇怕佢兩公婆一早做足準備，幾凍都唔怕啦！

唐唐連南極都玩埋，究竟返港後有乜大計呢？據佢身邊好友透露，佢從來冇講過話退休，相信休息夠後都會搵啲嘢搞吓。至於搞乜呢？呢位好友就大賣關子喇。不過，記得唐媽媽講過，唐唐從政咁耐，佢就幫手睇住盤家族生意咁耐，所以唐唐落選後，佢係時候功成身退歎世界，如果唐唐返港後又再搞嘢，咁唐媽媽咪甩唔到身？