香港中華總商會尋晚舉行新一屆就職晚宴，唔少政商界猛人都畀面到賀。中總新任會長楊釗話希望任內可弘揚中華文化，明年其中一項重點係辦學生交流團，望香港學生增加對祖國了解。
中總新班子就職固然高興，但點知各人大參選人仲高興，事關中總製造咗一個場合畀佢哋滿場飛拉票，有人未夠六點鐘已抵達會場，有人仲帶埋幾個助手去派卡片，完全冇放棄任何一個拉票機會。其中代表新界社團聯會參選嘅陳勇話，上屆人大選舉黃宜弘都係差幾票落敗，所以一票都不能少咁話喎！
中總新會長楊釗（右四）、永遠榮譽會長曾憲梓（中）同一眾副會長盧文端（左起）、莊學山、袁武、陳幼南；曾智明（右起）、林樹哲、李德麟合照。
