SUN微博：打橫嚟講：財爺！勿又亂花香港人錢呀！

我一直都話香港特區政府的管理手法殘舊落後，一蟹不如一蟹，咁倒退法唔單止畀貴州陝西追過頭，就快回到清朝咸豐o架啦！

香港特區政府行為鬼祟，每有新嘢想推出街前，總愛派啲九唔搭八嘅茄喱啡出嚟放風試水溫，博大家一不留神。佢哋就話已「諮詢」過，「無人」反對咁話，例如，早前房屋政策吵得熱烘烘時，就走出一件苦瓜乾咁樣嘅蔡老頭說三道四，真叫人難受！

今日，呢個香港會議展覽中心管理公司，借捐贈「廚餘」作幌子，叫個小職員李大姑出來，話甚麼「會展面積未能擴充」，及「全年展期接近飽和」，如政府不供地擴建，本港會失去競爭力和商機云云，但當記者問要否增聘人手時，她又話「全球經濟不明朗」，要睇吓點再算！咁！即係無把握搵到生意啦！仲加大個場嚟把Q咩！

呢個會展阿姑背後大老闆係貿發局班庸才，佢哋一直吼住隔籬球場塊地，表面話擴大生意，實則又假大空一番。現今，國際級嘅優質展覽，唔去上海，都喺澳門搞啦！你貿發局班粉腸嘅管理咁流，居然展覽期間可以天花電線漏電造成火災，事後又唔賠償，醜死怪得很啦！仲逼政府供地？

嗱！李大姑亦話，即使政府明日批地，也要搞幾年至掂，到時，上海最大嘅會展中心也落成啦！香港便輸了！係囉！咁仲起新大樓嚟托杉乎？

幸好，會展公司派個咁Q誠實嘅董事總經理嚟放風，否則，香港又衰多一鑊！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot