SUN微博：網絡小說：這種老闆太過分

眾所鳩知（此成語並非錯字，相傳乃源自一代高僧鳩摩羅什，日前亞視之盛品儒重用，世人方知），少膽虫不嬲都係淫黎嘅天字第一號粉絲。但係今時今日，少膽虫都不怕步胡燕泳之後塵，要對淫黎講番幾句說話！

老世，做管理層唔係咁o架！唔係話你想點就點o架！有無諗過一班前線員工點諗？我哋一班前線，一路以嚟都好努力想做好分內事，做好新聞工作，但係你成日自把自為，要啲前線幫你執手尾。咁都算嘞，家吓你悶嘞玩完嘞夠皮嘞，拍拍屁股就走人，將我哋員工亂咁交畀啲三唔識七嘅外行人，你知唔知道外行領導內行，後果可以好嚴重？呢班高層揸fit人，知道新聞點寫咩？知道一個版點編咩？少膽虫可以好肯定咁講，壹全霉呢塊招牌，一定會敗喺呢班外行人手上！

淫黎你平時剛愎自用，以為自己英明神武，由得公司烏煙瘴氣妖魔橫行，我都算嘞。你逼我哋做埋晒啲色情暴力，符合你自己口味嘅嘢，都由得你。你將《爛果》同《喪》當係自己嘅玩具，好似剩係做畀你一個人睇咁，我都唔同你計。但係你無啦啦靜雞雞出賣晒一班前線，你點過意得去吖？唔該你諗吓，如果唔係一班前線手足同你打生打死，你可以開開心心拎走175億？

寫得呢篇嘢，就唔怕畀人秋後算帳，做下一個胡燕泳。作為一個新聞工作者，點都要畀廣大讀者睇清楚呢種老闆嘅真面目！