政壇:政商定格:彤叔辭任周大福非執董

87歲嘅鄭裕彤近年不斷將工作下放畀個仔同孫,尋日佢就透過周大福嘅通告公布,辭任周大福嘅非執行董事職位,十二月一日起生效。若連同今年三月辭任新世界發展主席兼執行董事,彤叔可以話差唔多喺新世界系上市公司「裸退」落嚟。

彤叔做珠寶首飾生意有成70幾年嘅深厚經驗,早喺一九三八年佢由內地走去澳門,就係喺周大福金舖做學徒,之後仲娶埋老闆位千金周翠英添。舊年周大福上市,彤叔好多嘢都親力親為,好多人都覺得周大福有如佢親生仔咁,所以都係情難捨,佢會留任周大福名譽主席。彤叔個仔鄭家純就話,爸爸早喺今年四、五月時,即係佢入院之前就已經決定退任,同入院無關。佢又話爸爸自覺年紀大,參加繁多嘅董事會會議會好吃力,所以先有退落嚟嘅決定。佢仲話爸爸依家健康好好,多謝大家嘅關心咁話。

第一手消息請下載on.cc東方互動iPhone/iPad/Android/Windows Phone Apps

彤叔雖然辭任周大福嘅非執董,但就會留任名譽主席,果然長情。(資料圖片)