政壇：政商定格：八珍後人齊撐新廠啟用

龍年效應，今年香港出生率特別高，連帶以售賣甜醋起家嘅八珍集團今年生意有雙位數升幅。作為八珍掌舵人嘅董事總經理伍錦康展望將來滿懷信心，佢話因為甜醋已經唔再限於煲豬腳薑，而係可以走入西餐食譜大玩Fusion咁話。

伍錦康話甜醋之所以跳出框框，係因為有一位美國顧客嘅意見回饋，話將甜醋淋落雪糕度食特別滋味，於是佢發覺甜醋同意大利黑醋好相似。佢話本地有某間獲米芝蓮二星評級餐廳，就係用八珍嘅甜醋炮製西餐。

八珍八十周年，佢哋喺將軍澳嘅新廠房亦宣布啟用，伍錦康乖仔伍尚鈞同女兒、財經事務及庫務局前政助「坡妹」伍潔鏇尋日亦有出席周年慶典，但佢哋都話目前無意接掌家族事業。