政壇：師奶誤當慢必係啤梨

人民力量立法會議員「慢必」陳志全尋日喺社交網站自爆，晏晝喺中環一間茶餐廳食飯時，有個坐佢附近嘅師奶突然走上前，竟然問佢係唔係電台節目主持「啤梨」葉文輝，搞到佢即時「O晒嘴」，惟有面懵懵咁講句「其實我唔係」，迅速將個師奶打發走。

慢必話成件事除令佢覺得啼笑皆非外，仲令佢諗起自己成日畀人認錯做明星或電台主持。佢憶述舊年搭小巴時，兩個阿太不斷喺佢隔籬竊竊私語，其中一個師奶之後就擰轉頭問佢係唔係創作歌手林一峰，佢梗係即時否認喇。

最經典一定係喺幾年前，佢喺金鐘一間酒店畀清潔嬸嬸認錯佢係電台做唱片騎師嘅鍾保羅。鍾保羅喺八十年代紅極一時，係當時年輕人嘅偶像，但佢喺八九年跳樓自殺身亡。當時聽到清潔嬸嬸咁講，慢必話佢當堂嚇咗一跳喎！慢必話成日畀人認錯可能係自己嘅形象未夠突出，所以未來要積極諗計提升知名度。