政壇：張鐵夫挾220提名選人大

港區全國人大代表換屆選舉提名期下月四日結束，好擔心自己淪為中聯辦劉江華嘅中聯辦社會工作部部長張鐵夫尋日攞住二百二十幾個提名去報名，工聯會榮譽會長鄭耀棠同理事長吳秋北攞到嘅提名仲多，兩人都分別攞到超過二百五十個提名，成為當日「提名票王」。至於角逐連任港區人大嘅蔡素玉亦攞到二百二十五個提名，祖籍福建嘅佢話今日先會去拜會同屬福建嘅選委，自己又會陸續爭取各界支持，所以相信最後有機會攞到近三百張提名票喎！

有傳行政會議成員Bernard陳智思今屆棄選，準備五年後選特首，佢就話呢個講法超越佢想像，而且選特首唔喺佢計劃之內，其實考慮咁耐至決定報名競逐連任人大，係擔心人大同行會角色有衝突，但諗到中港融合涉及咁多議題，相信做人大會對行會有幫助至決定參選。