SUN微博：打橫嚟講：香港真係五十年不變啫！

各位！未睇落去之前，請大家撫心自問，嗱！千祈唔好講大話，自己呃自己呀！我在此想問大家：你哋話，香港是否一個國際級嘅大都會呢？

你嘅答案，我唔知！但我覺得，今日香港都應該係國際大都會啩！起碼，周街有好多外國人，而西餐廳亦唔少，加上內地大陸人落嚟都可以買到「非中國」出產嘅奶粉同月事布啦！

點解我會咁問呢？

哦！因為有時睇到啲新聞事件，都幾舊式和落後嘅！如果唔了解實況，真係以為「回到舊時」，五十年不變呀！

喺呢十日之內，警方在街邊放置嘅巡警「簽到簿」被人偷了三次，正確嘅講法，係「簽到簿」連裝住呢本嘢嘅「鐵箱」，一併畀人偷走咗！

呢世仔從未睇過「簽到簿」裏面係點嘅！只是「簽到」吖？定會寫少少Report咁呢？唔清楚，但此類鐵箱，好多時只用一條麻繩仔綁在街邊牆角，有時見「風餐露宿」打擊下，條繩仔斷咗一半，成件嘢「吊吊揈」咁掛在半空，好鬼淒涼，同噏耷。

究竟，呢個「簽到」制度，使唔使咁落後，又係唔係用此方法去監察警察叔叔呢？怕佢哋「蛇王」？乜差人唔係好有紀律o架咩？曾有警隊人士反映，呢種簽到簿，嚴重暴露警察嘅行蹤同私隱，應早就要改以先進嘅GPS系統取代啦！

但唔知點解，警方高層仍愛前朝英國佬留下的一套，真頭！所以，我才問：香港係個乜嘢級數嘅地方囉！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot