SUN微博：少膽虫手記：好快轉新工

少膽虫唔止一次喺呢度講過，除咗壹全霉之外，都幾難係其他傳媒度做。其實少膽虫咁講真係唔係擦鞋，只不過唔係事實嘅全部。特別係淫賤黎今日「的」咗我去開會訓話，少膽虫更加之覺得要轉工喇。

呢排少膽虫出入堆填區，連剩番少少嘅膽都無晒，因為最驚就係同事叫埋我一齊集會。你知啦，高層出面，變成啞視咁都算啦，你估少膽虫真係咁清高咩，我都緊張自己飯碗o架！

就係呢個時候，淫賤黎就醒咗我兩句。佢推咗我入房，一關門，即刻癲左咁大嗌：「哈哈！終於簽咗約喇！想食幾多包旺旺都得！」少膽虫只好苦笑，同佢講番：「你就拍拍個蘿柚返嚟，難為我仲要幫你搞掂啲手尾。」點知佢好得戚咁話：「少膽虫，等我賣埋香港爛果，你仲有大把手尾跟呀！」少膽虫當堂嚇到碌落地，口震震咁問：「唔係啩？」

「你睇吓我個喉核先。」淫賤黎指住自己條頸問少膽虫。咁佢肥騰騰咁樣，鬼見到佢粒喉核咩？少膽虫只好扮嘢：「係喎，好靚仔喎粒喉核。」點知淫賤黎勁不屑：「死擦鞋仔！我係話我無喉核，鬼佬話嘅Adam's apple呀！」少膽虫恍然大悟。淫賤黎嘆咗一口氣，繼續講：「鬼佬既然咁講，我注定同apple無緣，一定要賣晒爛果佢喇。」淫賤黎最後拍一拍少膽虫膊頭，語重心長咁話：「你都起碼有擦鞋呢一技之長，諗吓撈第二瓣啦。」

少膽虫做咁耐，都未試過聽過淫賤黎咁坦白。諗吓諗吓，呢行係點都做唔長o架啦。所以呢，有見於淫賤黎賣個爛果都億億聲，少膽虫都係決定，聽朝一早落果欄開工算喇。