政壇：搞搞政：建仔區會霸位工聯反面

建仔嘅立法會議員鍾樹根尋日正式向東區區議會遞信辭去主席一職，據聞建仔早已決定畀該黨嘅區會副主席黃建彬坐正，咁副主席個空缺又點算呢？按照不成文傳統，通常正副主席都由唔同政黨議員擔任，但今次建仔恃住人多蝦人少，聯同友好議員，投票已過晒半數，自然霸晒正、副主席兩個位。

工聯會覺得建仔太霸道，於是諗到一條絕橋，就係趁委員會開會時拉大隊離場抗議，寧願流會都唔畀建仔專美。

樹根承認工聯會最近已先後兩次開會時拉隊離場，令到區會運作受阻，佢覺得工聯會咁做法，建仔亦唔會妥協，一定會爭到底。佢仲話工聯會喺立會選舉時都冇幫建仔，點解建仔要喺區會層面禮讓對方呢？其實依家工聯會嘅區會都有個身兼立會勞工界議員郭偉強，背後仲有個扎根東區嘅王國興，所以工聯會想撈番個主席位亦無可厚非。咁搞法，睇怕雙方嘅積怨要等「更高人士」出手先至可以擺平。