政壇：青聯周沁校服派對慶生

香港青年聯會副秘書長Dorothy周沁日前大搞校服生日派對，青聯一班兄弟姊妹齊齊着白恤衫打晒呔，化身卜卜脆嘅學生哥、學生妹，仲請埋立法會議員Paul謝偉俊同全國青聯副主席陳仲尼一齊慶祝，同場仲見到馬會大董葉澍堃大仔Hiram葉瀚林同未婚妻Connie，佢哋即場宣布喜訊，喺本周六拉埋天窗。

阿Paul嘅衣着經常有驚喜，當晚就着住中山裝赴會，但佢為咗迎合校服主題，就辯稱呢個係神父打扮喎，咁地位咪好高？無論係中山裝定係神父都唔重要，因為一樣受歡迎，全場索女「學生」都爭住同佢合照留念。另一個受歡迎嘅型男，相信要數攝影師Philip曾學銘，當晚唔少女同學都指定要搵佢幫手揸機影相。細問之下，原來佢就係幫霍家長孫霍啟剛同「跳水公主」郭晶晶嘅婚禮攝影師，之前Dorothy結婚都係搵佢操刀嘅。