政壇：郭樹清順「民意」唔提股市
近排滬深股市連創新低，2,000點大底都穿埋，內地小股民損手爛腳之餘，對中證監嘅怨氣都直線上升。身為中證監揸Fit人嘅郭樹清尋晚要出席財經年會發表講話。有小股民喺微博呼籲主席「唔好再提股市喇」，事關郭主席今年出咗咁多政策，完全止唔到股市下跌，A股尋日重溫完馮小剛《唐山大地震（1976）》，好驚郭主席又帶大家去睇《1942》。
唔知係咪聽到股民嘅呼籲，郭主席尋晚演講完全避開股市，主要發表對經濟綜合改革嘅意見，仲特別建議將30%至50%嘅國有資產劃撥畀社保基金。其實內地股市嘅困局點只關郭樹清一個嘅事，中證監嘅工作係提供公平交易嘅環境，個市嘅升跌，又點叫監管部門保證呢？
郭樹清尋晚喺財經年會發表嘅演講完全避開股市。（資料圖片）