政壇：議員剛上任即諗外遊

立法會每屆都會以考察外地嘅立法機關為名派代表團出埠，新一屆立法會上任僅兩個月，已經又商量緊今屆去邊度外遊。有立法會議員就話，香港遲啲會推行全面普選，不如去實施緊比例代表制嘅德國視察吓。唉，長者生活津貼撥款申請搞咁耐都未過到，加上依家講普選都言之尚早，咁快話要為普選做功課，早唔早啲呀？

由劉慧卿做主席嘅議會聯絡小組委員會日前開會討論今屆去邊度考察好，有人就建議要為香港將來普選做功課，因為將來好可能都係行番全區比例代表制，所以應該要去一啲議會都係實行緊全區比例代表制嘅國家睇吓。立法會秘書處搵過資料，話德國同以色列都可以選擇。不過以色列依家兵荒馬亂，好多議員都話怕怕，一個唔好彩，未普選前先要補選，所以都係去德國好啲喎。

擺泛民回鄉問題上枱

此外，亦有議員忽然心繫家國，話立法會議員都好應該去吓北京，睇下全國人大代表大會開會嘅情況。但問題係有議員不被獲准返內地，所以有議員就話呢個問題困擾咁多年，真係要解決。

其實好多立法會議員都係全國人大代表、全國政協委員，佢哋都經常返內地，去唔到內地嘅來來去去咪又係嗰幾個冇回鄉卡嘅泛民主派議員囉。睇怕提出去北京睇人大開會嘅議員，都知道去北京嘅機會微乎其微，只係想打蛇隨棍上，又再將泛民議員回鄉卡嘅問題炒熱就真。