黑灰白：辣椒必要辣

有人食辣又怕辣，為遷就客人口味，有食肆夾硬將食品辣度減低，搞到泰國唔泰國，四川唔四川，不三不四，風味全無。食辣椒唔辣，不如咪食，食番茄好過。

梁先生以辣招歡宴地產商，果真非同凡響。最初以為會錫住客人，點知原來財爺落場做大廚，出手真係幾重，雖未到指天椒級數，已足令人面紅耳熱，口乾舌燥。淺嘗後，客人無不大叫必須減辣，唔係餐飯就不能再食落去！依家問題係啲餸菜到底夠辣未？客人會唔會反枱而行？班人真係行咗去，個天係唔係就會冧落嚟？

梁先生就任至今新猷唔少，可惜大部分推極唔成。住房問題係重中之重，梁先生對此非常關注，但藥石亂投，病況仍未轉好，地產商同炒家根本當政府無到，樓價地價愈管愈高。開拓地源多建房屋之餘，政府必須暫時遏止樓價飆升，增加地產商炒賣成本同風險，減低炒家盲目投資意欲。大徵房產買賣印花稅最直截了當，是最快見功嘅短期招數。

辣招實施一個月，房產市場漸漸作出反應，開始發生交投轉淡、有價無市嘅情況；地產商亦感形勢不妙，提出減辣要求。辣招既然達到應有效果，政府絕對不能腳軟，為山九仞功虧一簣。梁先生政治上能否翻身，就睇係咪可以憑辣招穩定樓價，千祈唔好貿然向地產商屈服至好。