SUN世代：「我係金魚仔」

「我係金魚仔嚟o架！」張智恆說完哈哈大笑，記者卻聽得一頭霧水。轉個頭，他隨即自揭謎底，「老竇以前喺街市開檔賣金魚，佢係金魚佬，我咪係金魚仔囉！」每逢學校假期，他就會變成真正的「金魚仔」，落舖幫手賣紅蟲、打氣入膠袋，「試過有年老竇同媽咪去旅行，都係我負責看舖。所以講到做生意，嗰時已經開始，哈哈！」

他是家中孻仔，自小在屋邨長大，不愛讀書，只愛「通山跑」，「我細個好鬼曳，條邨對面有座山，一放學就會跑去嗰度玩，搞到老竇好激氣，由細打到我大。」小六那年，兩父子在茶餐廳「傾心事」，自此父親不再打他，「佢話我大個仔喇，唔會再打我，淨係想我生生性性做人，讀唔成書唔緊要，最緊要唔好做壞事。呢樣嘢我一直記住。」現在，街市荒廢了，但金魚舖的招牌仍然掛在店外，他每次重臨舊地，段段童年回憶都會湧上心頭。