SUN微博：打橫嚟講：巧取豪奪無人性的強迫金

呢個畀全香港七百萬人鬧足十二年嘅「強迫金」（原名「強積金」），唔知邊條蠶蟲師爺度出來禍害香港嘅屎橋，搞到今日天怒人怨不特止，若政府唔拿拿臨處理妥當，還是會繼續延害下去，這處永無寧日！

強積金管理局跳出來撲火，話拯救水深火熱的強迫金災民，並拋出四條屎到無朋友的死橋，例如請基金公司收順啲、又或叫災民多用電子付款結算系統、精簡運作程序，將數據處理程序統一化喎！

真白癡反智的「建議」，叫有份供錢的三行工友去搞電子化系統，來遷就你哋呢啲「改革」？真倒果為因。

強積金之禍港殃民，源頭來自官商勾結，將責任擔子撥歸小市民所有。當年，那個現正被廉記告緊嘅許仕仁一力推行呢個「供款制度」，表面說讓勞資雙方合力供款，待市民退休後有筆錢傍身，暗地裏，卻原來一個打工仔嘅供款，可以有六個機構分水的（受託人、投資經理、保薦人、管理人、保管人及中介人），將我哋嘅血汗錢巧取豪奪，仲係鬼鬼祟祟嗰隻添噃！真係「乞兒兜搶飯食」嘅吸血鬼人渣所為！

話強積金管理局屎橋，因佢哋實在太廢，除計劃小修小補之外，還是這些改革的短期措施係無法律效力的，只是「重金」禮聘顧問公司做個研究報告出嚟，大龍鳳一輪後，我哋咪又嘔出血汗錢，落啲既得利益者嘅袋裏；所以，我在此一直喊停，要取消呢個無人性、全球收費最高（即掠奪），並禍港害人嘅強積金供款，改由政府搞全民退休保障，才是利民正道！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆

讀者可透過智能手機下載「東方互動」app，於「爆料」項上載影片大爆特爆！

email：sunweibo@opg.com.hk

「就係敢爆」網址tv.on.cc/hot