政壇：港大頒學位姚明躬身相就
港大尋日喺亞洲國際博覽館舉行第一百八十七屆學位頒授典禮，身兼校監嘅特首梁振英主持頒授儀式，除過千名畢業生外，亦分別頒授咗兩個榮譽社會科學博士學位畀籃球巨星姚明，同新世界發展主席鄭家純。典禮開始時，港大播起最新灌錄嘅校歌，校長徐立之、校監梁振英等徐徐步入會場。
身高七呎四吋嘅姚明上台獲頒授學位時，惹來全場歡呼。不過姚明都為校方幫佢着袍及上飾帶嘅人員帶來難題，姚明更要九十度躬身相就，校方對姚明嘅讚詞包括「笑口常開」同「引人注目嘅高度同國字臉時」，姚明又好調皮咁擺出相關嘅動作。鄭家純就話，希望好似佢咁做生意嘅人，要喺搵到錢之後，用番嚟建設社會，以盡本分。
此外，前終審法院常任法官包致金亦獲頒授名譽法學博士。
純官（左二）同姚明（左一）同獲港大頒授榮譽社會科學博士學位，梁振英（右）擔任主禮嘉賓。
職員幫姚明（左）上飾帶時顯得有困難。