政壇：搞搞政：梁錦松身兼多職密密執
前財政司司長梁錦松重投商界後，喺黑石集團（Black Stone Group）大中華區主席一職上做得如魚得水，尋日有報道話佢會去招商資本做高層，負責操盤，不過，阿松就同我哋講，呢個消息並唔正確，因為佢只係去招商資本做非執行董事，咁講，即係阿松又多份兼職啫，雖然收入同正職差好遠，但阿松一於多啲嚟、密啲手！
黑石集團係全球最大嘅私募基金之一，阿松○三年七月辭任財政司司長後，休息冇耐就加入呢個機構，佢尋日話，喺黑石做得好開心，無計劃轉工。呢份正職之外，佢亦做咗工商銀行獨立董事六年半，依家做埋招商資本非執董，用另一角度為國家服務咁話。
一年將盡，阿松睇未來經濟都話隨住歐美嘅經濟穩步上揚，有信心中國同香港嘅中長期都能夠保持增長嘅動力，所以都係睇好嘅。
設計圖片及對白