政壇：發叔扶助女婿做新界王

鄉議局主席劉皇發已屆八十七歲高齡，前日話自己做埋今屆就會收山，仲大講接班人五大條件添，又透露副主席張學明唔肯做，咁邊個接班？有鄉紳透露，其實發叔多年來一直扶植其女婿、信和置業總經理余漢坤上位，做新一代「新界王」。

發叔嘅接班人五條件：做事夠熱心、人緣好、同政府傾到偈、得鄉親信任，再加充足經濟能力，符合嘅鄉事人選唔少，但發叔已經以怕閒言閒語封咗阿仔劉業強嘅後路，於是有鄉紳分析，餘下可以接班嘅人就只有女婿Randy。

喺大澳出生嘅Randy喺外國浸完鹹水返港，已連續兩屆獲委任為離島區議員。我哋收到消息，Randy下月會同現任離島區議員黃福根開設聯合辦事處，有傳黃福根下屆會退休，Randy就睇中呢個空缺，希望趁政府取消區議會委任制時，轉選呢個選區，如果當選，繼而挑戰離島區議會主席一職。成唔成事仲未知，我哋曾經搵過Randy，但到截稿前仍未回覆。