政壇：神探輝臨別話當年

已辭職嘅衞生防護中心總監曾浩輝（神探輝）仲有一個月就變自由身，然後會去法國南部酒莊歎世界！曾經喺衞生署同神探輝合作無間嘅醫院管理局行政總裁梁栢賢（PY），尋日特登邀請神探輝上去佢主持嘅醫管局內聯網節目「神探輝話當年」，期間梁栢賢問佢遲啲係咪主力搵老婆？神探輝一啲唔急，話去完法國酒莊品酒後，再去美國同澳洲探朋友，但應承一年後會返香港再服務廣大市民喎！

個節目都講到神探輝喺沙士期間成功搵到病毒源頭嘅過程，九二年開始入衞生署做醫生嘅神探輝話，○三年擔任社會醫學顧問醫生期間撞正沙士，要帶隊上京華國際酒店查案咁查，搵番病毒源頭出嚟。講到「學嘢」仲開心，九七年全球爆禽流感時，難得有機會去美國疾病預防及控制中心深造，增值唔少。

之前被阿爸阿媽「出賣」展示陳年生活照，仲大爆催極佢都唔結婚，神探輝似乎唔介意，仲講笑話：「篇報道好似徵婚廣告！」