政壇：范太選人大忽然收口

全國人大常委范徐麗泰一向敢言，佢嘅身份，亦令市民對佢嘅言論格外重視，不過，尋日佢報名參選人大時，卻忽然收口，話人大身份係負責為內地立法同監察中央政府，並唔係睇住香港內部事務，只係強調過去所講嘅嘢，係以「一個香港普通市民身份」發言，並唔係以人大常委身份發言喎。之但係一般人點知范太幾時用人大常委身份，幾時用普通市民身份發言呢？唔通次次都要問過佢咩？

范太講明自己要投入人大選舉工程，未來一段時間都唔會作出評論喎。正當大家要求范太以人大身份評論特首梁振英嘅僭建事件時，范太就嚟一招「金蟬脫殼」。

點解佢會突然收口？范太話無收過指示，亦唔係擔心影響選情而收口，只係想用多啲時間聚焦選舉工程。問范太擔唔擔心低票當選人大，佢就話：「高票就高票，低票就低票，唔當選咪唔當選囉！」講咗等於冇講，其實范太當選人大應該唔難，但能否連任人大常委就係另一回事喇。