政壇：行會請願騷民協執輸

新一屆立法會議席大增，但泛民政黨卻幾乎無得益，大黨失議席，小黨如民協咁依然只得一把聲，為咗避免泡沫化或被港人遺忘，佢哋原來有條長保曝光率嘅絕橋，就係好多時都會趁周二行會舉行時，拉隊到場請願，隊伍有時由民協高層帶隊，多數係黨內第二梯隊。尋日朝早寒流襲港、天寒地凍，民協請願隊卻遲人一步，搞到行會抗議專場被另一組織霸咗靚位，民協大佬馮檢基使唔使發吓功、谷吓同事下次早啲到呢﹖

黨內新人爭曝光

馮檢基喺立法會苦撐一人黨多年，民協內部都知道冇後起之秀、冇足夠曝光率嘅政治第二梯隊係黨發展嘅死穴，所以行會請願變成其中一個爭取曝光率好地方。但行會外請願都有競爭o架，因為呢度好多時都會聚集唔同嘅人，一班聲言申訴無門嘅請願人士好多時懶理世人嘅目光，每星期風雨不改拎住同一封千字文，訴說同一單冤案，甚至口號都係同一個。

尋日，呢班常客之中竟然出現民協副主席譚國僑嘅身影，唔好以為譚國僑過咗檔，查實佢尋日只係抵達請願場地後，輸咗個身位，畀人霸咗個請願靚位，擾攘一輪後，佢終於喺呢班請願人士後面搵到個企位，最後要趷高腳遞信，叫CY開誠布公回應僭建。連請願都要做第二梯隊，唔通真係命運使然？

尋日天寒地凍，邊班請願人士成功擊退譚國僑呢？原來佢哋來頭都唔細，係家人於內地營商期間疑受內地官商勾結受騙嘅港商家屬，先後向全國人大、最高人民法院求助不果，前排先喺北京上訪返港，唔知以後會唔會民協連請願都有對手呢？