SUN微博：打橫嚟講：白色孔夫子尿片

怪不得，近年在國際間調查的報告，顯示香港地位愈來愈衰，就算是「快樂都市」指數比較，香港特區也近包尾，即係話此地嘅人不甚快樂。唔知有無人研究吓，呢個特區喺「安全都市」排行榜裏，會淪落到乜叉嘢地步呢？

如果香港地係好鬼安全嘅！又點解政府要廣布「隱蔽攝錄機」（CCTV），凡有街角嘅地點，總有多部「偷拍鏡」喺你左右，仲密過「些粉異呢墳」呢！似有外部勢力嘅恐怖分子隨時打到嚟咁！真係「孔夫子尿片」——「恐×怖」也！

講到恐怖，還不及有人為掩飾真相而講大話，不肯講真話。

昨日，本報重點獨家揭露消防處在救護車和消防車上狂裝多個「隱蔽」鏡頭，作「偷拍」之用。話佢哋「偷拍」，係因為消防處由安裝到拍攝，都從無通知或諮詢過公眾，亦未得社會認同，已買咗機裝嵌；拍攝前又無話畀人知，極之嚴重侵犯人家私隱，兼有違反人權之能事！

咁都未算恐怖，最得人驚係有人講大話唔眨眼，就係有關處方初時聲稱安裝鏡頭，係用嚟拍攝路上「不讓路」嘅車輛喎！吓！仲有無更白癡嘅答案呀！一架「白車」，前後左右最少有四個隱蔽式鏡頭同時「撈機」，仲大製作過王家衞導演，即使拍到有人不讓路，咁點呢？要佢哋填命乎？至今，政府連幾耐至銷毀所拍到的影帶都唔敢答，咁背後有乜不見得光嘅動機、陰謀或任務呢？

家陣，通街定點CCTV都唔夠，仲要有「流動」的四圍走，玩追蹤？真好鬼白色孔子尿片啫！驚驚！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

email：sunweibo@opg.com.hk

「就係咁爆」網址：tv.on.cc/hot