政壇：政商定格：康禮賢投資團隊似聯合國
吸取多元文化係擴闊視野好方法，連國泰康利資產管理（CCAM）行政總裁康禮賢（Mark Konyn）都話，搞基金投資最好都係有如聯合國嘅團隊。
Mark哥雖然喺香港住咗好多年，但就唔係好buy本港基金公司嗰套，話望落去成team人背景同學歷都好似，可能都係讀工程出身，學喺相同市況買賣，做嘢模式好似「啤」出嚟咁。
咁佢又點請人？佢笑笑口一個字：「Random（隨意）！」佢話依家香港公司細，得十幾個人，投資團隊其實融合咗唔同文化與背景，有中國人、印度人、西人，年紀最大嘅有二十五年經驗，後生嘅就只入行五年，佢哋同樣專業同有經驗，一齊腦震盪會擦出更多火花、有更嶄新更全面嘅諗頭。咁會唔會有代溝？Mark哥話最緊要有開放嘅環境畀員工表達自己。
康禮賢話本港基金公司團隊背景好似，做嘢模式似「啤」出嚟。