政壇：政商定格：張鳳婷：國泰節流唔減薪
國泰航空新任企業事務董事Chitty張鳳婷尋日帶同六名女將同傳媒會面，當中五人任職企業傳訊部。Chitty喺國泰服務咗二十幾年，又曾派駐海外多年，難怪佢啱啱上任就已經對國泰內部運作瞭如指掌。佢話國泰如要節流，會先考慮削減燃油開支，減少部分長線航班，點都未輪到打員工薪酬主意，即係唔會減薪喇！至於明年加薪幾多，佢就話未知喇，但就話國泰打算明年聘請五百名機艙服務員添！
統領國泰九千名機艙服務員嘅總經理Liza吳秀蘭話，班同事唔少身懷絕技，有魔術師、馬拉松好手等，由於機艙服務員經常要飛嚟飛去，為咗同佢哋多啲溝通，公司每六個星期舉辦一次座談會，遲啲仲會整番個app畀員工，等佢哋可以隨時發表意見添。
張鳳婷（中）、吳秀蘭（右三）同國泰企業傳訊部五位女將一同亮相。