政壇：搞搞政：老公選人大蔣麗芸護駕

港區全國人大換屆選舉尋日繼續接受各界報名，至少有九人親自報名參選，要數最合拍同具娛樂性，首推初次參選人大嘅梁海明。

梁海明全程由太太、立法會議員阿Ann蔣麗芸陪住，可能因為喺政圈打滾多年，亦同記者打慣交道，所以阿Ann做咗老公嘅代言人，幾乎在場記者有乜提問，阿Ann都幫手回應，而且仲落力推介丈夫喺和解同仲裁方面做咗大量工作，好明顯阿Ann係「護夫心切」。

都係首次參選人大嘅保安局前局長李少光就喺近十個舊拍檔陪同下報名。本身係九龍社團聯會代表嘅高寶齡唔選，但就聯同油尖旺區議會主席鍾港武等人力撐接班人陳振彬出選。

因為今次選舉異常激烈，觸發一場前所未有嘅「拉票戰」，但有人大參選人拉票手法無所不用其極，更傳甚至有人向有份投票嘅選舉團成員請食貴價鮑魚、魚翅。雖然人大選舉喺香港並冇法例規管，但廉潔係香港多年來賴以成功嘅基石，身為港人為選人大要用呢啲內地慣常嘅手法，實在令人側目。不過大部分候選人都好守規矩拉票嘅。