政壇：雙明撐非主流音樂交流
由歌手黃耀明發起嘅文藝復興基金會，上周六於西九龍文化區舉行一場長達七小時嘅馬拉松式音樂會，邀請咗兩岸三地嘅非主流歌手輪流獻唱，畀上萬個市民及年輕人免費入場觀賞。
開設投資公司嘅商會青委Johnny陳光明都有份贊助音樂會，佢坦言愛聽非主流音樂，又話：「唔少主流音樂藝術都帶有負面情緒，非主流則帶來正能量，聽落好舒服，有助減壓。」
黃耀明話音樂會只屬基金會嘅其中一個項目，其餘仲有一連五星期嘅電影節同文學活動，希望能夠提供一個平台畀唔同地方嘅歌手交流。
黃仲透露，基金會將招募導演、音樂人開班發掘年輕人潛能，培育更多文化界新血。
陳光明（左）同黃耀明齊齊推動兩岸四地嘅藝術文化交流。