政壇：李常盛一門三傑瓣瓣掂

康業國際集團董事會主席李常盛嘅大仔Steven李根泰，擔任康業信貸快遞行政總裁，將家族業務打理得有聲有色，而二仔Edwin李根興同愛女Amy李鈺涵則各闖唔同領域，各有所長。日前喺一個活動上見到Edwin同腹大便便嘅太太Rita，已有兩個囡囡嘅Edwin透露，太太呢一胎都係女，預產期十二月。問佢會唔會追番個仔，佢就笑言三個夠晒數喇。

Edwin係「盛匯商機」嘅創辦人，佢話依家喺香港創業殊不容易，成本高、租金貴、請人難，請個補習老師仲平過請洗碗工，又眼見時下父母愈來愈緊張子女學業，故此近年唔少人轉行做教育，而佢都有畀囡囡上學前教育班。至於Amy就創立公關公司並擔任執行董事，凡事親力親為，日前先見到佢客串埋活動嘅司儀，表現淡定又大方。三個仔女都各有成就，相信李常盛真係飲得杯落。