政壇：發叔傳裸退冇次真

年屆八十七歲嘅「新界王」劉皇發依然活躍政界，其實咁多年嚟都傳過佢「裸退」嘅消息，但係冇次真。

由八十年代開始，發叔一直連任新界鄉議局主席到依家，雄霸新界足足二十幾年，可以話係新界歷史嘅「活字典」，但最近幾年都開始傳佢會退落嚟，不過次次都好似跳草裙舞咁，扭扭擰擰一輪之後都無疾而終，最終都係由佢做番主席。

仔仔做怕被質疑

尋日佢又被問到下屆會唔會退位讓賢，佢就話自己都做咗好多屆，真係唔想再做主席喎。到底有乜嘢人可以接到班？佢就拋出五大條件，包括做事夠熱心、人緣好、同政府傾到偈、得鄉親信任同最尾一項，就係有充足經濟能力喇。

咁目前有乜嘢人具備晒呢五項要素呢？發叔就慨嘆，副主席張學明算係最幫得手嗰個，但最衰佢又唔肯做主席，只係肯做到副主席，如果唔係就一天光晒。至於佢個仔劉業強呢？發叔就話點都唔捧個仔去做呢啲位，費事被人話鄉議局係「家天下」啦，到時只會被人指指點點，害咗個仔。

咁講嚟講去都搵唔到合適人選，發叔幾年後會唔會又再做番呢？佢就話唔好搞佢喇，都做咗咁多年，係時候休息吓。其實發叔都唔係第一次咁講，對上兩次選舉佢又話唔做，只係班鄉親要佢做先至做喎。所以我哋聽住先啦，即管放長雙眼睇吓發叔今次係咪又跳草裙舞抑或真係收山囉？