SUN熱辣：內地港人掀回流潮

人民幣匯率持續上升，不但影響金融市場，亦打亂定居內地的港人生活。由於他們手持的港幣愈來愈「唔見使」，回流返港已成為新趨勢。有移居深圳四年的港商，因生意成本及生活費用較以往「無端端」增兩成，正計劃舉家返港；亦有多年前北上養老的退休人士，因手持的港幣積蓄，隨着人民幣升值而貶值，「消耗」速度較預期快，無可奈何下，要離開中山，返港入住老人院。

個案一：退休金貶值長者生活難

選擇回流的港人當中，除港商外，還有不少是退休人士。據一個協助內地港人的團體估計，現時約有八萬名本港退休長者長居內地，大部分居於廣東省。由於人民幣升值，令他們的港元積蓄「大打折扣」，不少惟有「回流」本港入住老人院，靠領取綜援及生果金過活。

而本港一間老人院的負責人張姑娘更指出，數年前，由內地返港入住的港人長者，只佔全院約二百人中的一至兩成，現時已增至近五成。

六十八歲的蘇伯便是其中一人。訪問當天，蘇伯剛由中山回港，入住位於上水的一間老人院。「○七年，我拎住二百萬港元退休金到中山，嗰時港幣匯率高，所以一直都無兌換成人民幣，依家戶口得番一千蚊，如果唔係人民幣咁貴，我都唔想返嚟。」

他憶述，當年退休時，因中山消費低，於當地購買樓宇後，打算「住過世」，無奈因患病，令開支急增，於是把物業也賣掉。「我爆過血管，淨係買藥錢，每個月都成千蚊人民幣，原本以為退休金夠用過世，點知呢兩年人仔升得咁快，令我大失預算。我返到嚟，有病可以去公立醫院求診，醫療費開支會少好多。」

個案二：利潤打八折港商蝕入肉

「以前拎住港紙仲係好好用，依家要打個八折，兩萬蚊港幣已經唔見咗四千，所以打算搬返香港住。」從事貿易生意的港商雷先生，四年前舉家北移，定居深圳。「當年好多客都鍾意喺上面傾生意，咪喺深圳租埋寫字樓，屋企人都搬晒上去住。」

不過，人民幣兌換價持續上升，近日港元兌人民幣匯率更曾跌破八算，雷在內地的廠房、寫字樓租金、人工、運輸，以及日常生活開支，均受到影響，開支增加近兩成，他大吐苦水說：「呢幾年，員工薪金由每月二、三千蚊加到六千蚊，租金每平方呎上漲咗三成。最慘嘅係大部分客人都係畀美金或港元，但就要換番人民幣找數，以前內地嘅工廠同公司都收美金，但依家只肯收人民幣，『蝕上加蝕』！」

去年他家中再添一員，令負擔加重。「港人喺內地無教育、醫療津貼，依家大女喺深圳讀緊私立幼稚園，每月學費要八千蚊人民幣﹗為省開支，我哋同小朋友病，都會返港睇醫生，平均每星期返港一次，順便買日用品。」他打算稍後舉家「回流」。