SUN微博:打橫嚟講:有錢出錢,有腦食腦

並非牙擦,亦唔係先知,但全港至現時為止,都只係得我一人(寫專欄或評論計算),力讚亞洲電視台;其他的,唔係揼佢,就不屑一談,真無眼光。

喂!大家有無諗吓,一間長久殘喘積弱,而收視又不過半,兼幾乎零廣告收入嘅電視台,有人肯兩年丟十億落去(嗱!係亞視義工王征自稱o架咋!可請審計署查核),吊住條命,同江主席一樣死去活來,唔畀佢冧,咁有「香港良心」,你班香港人,仲想點呀?

中國《兵書》有教:國強,以軍勇奪;國小,以智巧取。

亞視一夥大佬,在無錢無人的窘境之下,能在香港穩守「亞軍」寶座,絲毫不動,就憑有腦、食腦呀!君不見亞視新聞(唔係佢哋採訪的新聞,而係佢自家搞出嚟嘅驚人舉動),經常上到去港聞A疊o架咩?相比無綫新老闆與大胸奀星的緋聞,只能揳在娛樂版內頁,級數差好遠啫!

前日,有網民在網上吹雞號召去圍亞視總台,成個「小小超」翻版A貨嘅執行董事盛小朋友,叫多一百倍人手,反包圍那個「獨行俠」網民,足見亞視全台人幾咁齊心,敢於面對挑機!盛小兄弟能上港聞版,除咗佢個樣有明星相,似足那節目主持人「洗米華」之外,佢講的內容之震撼,亦有洗米華風範,佢話「成魔之王」偷走好多機密資料,影印到部機都壞埋,真係好鬼有劇加你話,點可不追看追捧吖?

亞視、亞視,我支持你!請多加兩宗獨家消息,江主席一定唔畀你哋死嘅!

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

email:sunweibo@opg.com.hk

「就係敢爆」網址tv.on.cc/hot

第一手消息請下載on.cc東方互動iPhone/iPad/Android/Windows Phone Apps