政壇：搞搞政：黑英同梁粉劃清界線
天文台前台長「黑英」林超英因幫過特首CY梁振英撰寫環保政綱，競選期間又曾經為CY站台，被視為「梁粉」一員都好理所當然。不過，黑英就好似好介意人哋叫佢「梁粉」咁，尋日仲同「梁粉」劃清界線。
話說前排有網民質疑黑英唔支持小班教學，反而建議減班，但CY政綱講好會搞小班教學，明寸佢身為「梁粉」都唔熟書。黑英一聽到「梁粉」就即刻反擊，強調自己從來只係「尊敬」CY有心為香港服務，但唔等於對CY施政盲目支持。佢又重申，自己絕對唔會對任何一個人「癡迷」，事關佢係一個獨立個體，唔係梁粉、就連「粉絲」、「米粉」、「河粉」都唔係。
佢仲叫大家凡事都要講道理，評論前亦要多方面考慮，一句講晒要「是其是、非其非」。佢脫離「梁粉」行列之際，仍不改「梁粉」口脗，唔知呢啲係咪叫藕斷絲連呢？
設計圖片