政壇：富貴黨望莎姐擔大旗

因為喺立法會香港島直選敗陣嘅劉健儀，唔再出任富貴黨主席，所以要另覓人選。之不過，該黨上星期決定用雙頭馬車嘅方法，搵咗田北俊同劉健儀雙雙擔任黨嘅榮譽主席，而主席一職仍由方剛暫代，未有人願意出嚟擔大旗。

我哋聽聞，該黨五位立會議員都決定提名湊孫淡出嘅副主席「莎姐」周梁淑怡做主席。原來要登上黨主席呢個位，門檻高過選特首，至少要有四分一嘅黨立會議員提名至得，由於現時該黨有五位議員，四捨五入下即係最少要兩位議員提名至得，此外，仲要一成黨員和議，咁至有資格角逐黨主席一職。

據聞最新嘅消息係五名立會議員全數決定提名莎姐做主席。我哋問過該黨老中青三代黨員，個個都話莎姐係合適人選，資深黨員大讚佢有豐富政商界人脈，後生嘅一批就覺得莎姐有威嚴，可以壓得住個場。

個個立會議員都聲稱有自己嘅難處，都唔願做主席，造成莎姐個勢咁勁，睇嚟佢都好難走得甩。莎姐尋日嘅回覆，係時間仲早，一切都要等黨嘅中委通過。結果係點，下月就會揭盅。