政壇：李少光周日入馬場輕鬆
保安局前局長李少光話有意貢獻國家，考慮參選全國港區人大代表換屆選舉，佢積極出擊，四圍搵紀律部隊前同事提名支持。雖然係新丁候選人，但佢都會「工作時工作，遊戲時遊戲」。尋日趁星期日放假，佢就入咗馬場輕鬆吓。
咁老定，莫非勝券在握？佢淡定話：「今日休息吓。」言下之意，似乎信心十足。果然佢坐足成個晏晝唔捨得走，立法會議員張華峰嘅愛駒出戰第六場，佢同行會成員林健鋒、立會議員梁君彥齊做啦啦隊，全程談笑風生。
努力拉票嘅仲有全國人大常委范徐麗泰，愛駒「自成一格」尋日出戰第五場，健康快車創會主席方黃吉雯咁蹺帶一班內地朋友入場消遣吓，知道范太有馬出賽，紛紛話要押注支持。
好彩，「自成一格」最後跑第二，內地朋友通通有錢袋，皆大歡喜。
忙於競選港區全國人大嘅李少光（右），偷閒入場同林健鋒（中）賞馬輕鬆吓。