政壇：李民橋慈善跑包尾
尋日聯合國兒童基金會搞咗場慈善跑，其中一組「三公里領袖賽」，搵到好多城中商界名人參加，當中連東亞銀行副行政總裁李民橋都有份跑，但跑跑吓冇晒影喎，仲阻住下一場開跑添！
李民橋身材「瘦蜢蜢」，加埋副超，十足長跑好手咁，但原來人不可以貌相，佢一開跑已經大墮後，隔咗成二十分鐘，當其他跑手陸續衝線時，都見唔到佢身影。
佢太太鄺淑嫻亦好心急，一直喺終點等老公，望穿秋水都等唔到，期間仲不停問其他參賽者：「我老公呢？佢跑咗去邊呀？」
其實在場一班工作人員比李民橋太太仲心急，因為尋日有多組賽事舉行，所以工作人員見李民橋遲遲未到，都不停話「吓！仲未到？」擔心會影響之後場賽事嘅起跑，好在最尾佢都趕得切。
李民橋跑到上氣唔接下氣，幾乎無晒影。