政壇：高永文有立會恐懼症

食物及衞生局局長高永文同七位立法會議員尋日出席一個全港抗抑鬱活動，同市民分享「抗抑」心得。佢哋之後仲做咗個心理測驗，測試近兩周嘅抑鬱指數，唔知大家係咪根本唔當抑鬱係一回事，定係好驚畀人誤會佢哋有嚴重抑鬱，個個都唔肯同抑鬱扯上關係。

陳家洛張國柱唔夠瞓

高醫生平時可能畀班議員質問到怕怕，佢話每朝起身第一件事就係睇報紙留意有冇人鬧佢，又透露自己嘅心情會喺去立會後跌至低點，所以對星期三有一股莫名其妙嘅恐懼。財委會近幾周審議長者生活津貼，社民連「長毛」梁國雄喺會上不斷拉布，高醫生話連佢都覺得辛苦。佢解釋，雖然議題同食物及衞生事務無關，但佢同樣要喺辦公室對住電視機跟進情況，所以收工後會暴飲暴食麻醉自己。

同高醫生被捱鬧嘅角色唔同，立會議員成日喺議事廳內鬧人，斷估都唔會出現太多抑鬱機會。建仔「EQ」葛珮帆話自己興趣多多冇乜抑鬱，但長毛近排喺開會時成日講無聊嘢，又要逼佢哋坐喺會議廳不斷撳鐘，搞到佢精神疲倦。佢又趁機話只要長毛放棄拉布，佢啲抑鬱徵狀就會好快消失。

公文袋嘅陳家洛就話有時瞓瞓吓覺會突然畀細仔嘅哭聲嘈醒，有時又要幫老婆手起身餵奶畀BB飲，所以平時淨係瞓到四至五粒鐘。同樣唔夠瞓嘅工黨張國柱就話，依家成日開會開到凌晨十二點，瞓得幾個鐘後又要起身做嘢，有時喺屋企睇電視睇足半個鐘頭都唔可以集中精神，唔信白鴿黨劉慧卿話自己乜嘢抑鬱徵狀都冇喎！