產科話設又唔設 醫局出爾又反爾

成也雙非，敗也雙非，雙非問題居然成為醫管局嘅百搭藉口，唔到你唔服。

呢，醫護人手不足，十個煲七個蓋，搞到醫院亂晒大龍，醫管局固然可以賴落雙非身上；家陣雙非被叫停，醫院壓力大減，人手照計冇咁緊張喇，點知醫管局又話因為冇咗雙非，所以將軍澳醫院唔需要設產科喎。叮，乜都佢哋講晒喇！

件事係咁嘅。港府○八年向立法會申請撥款十九億元擴建將軍澳醫院，當時實牙實齒承諾擴建後一定會增設產科，解決區內孕婦跨區分娩問題。醫管局條數係咁計嘅，由於將軍澳區冇私家醫院提供產科服務，將軍澳醫院增設產科「會有大比例本地孕婦」使用，估計每年分娩人數有二千九百宗。

好嘞，依家擴建工程就快完成，醫管局突然反口，聲稱公立醫院停收雙非孕婦後，產科需求下降，預計明年過後，區內孕婦於公院分娩個案每年只有二千三百至二千五百宗，不達每年三千宗嘅指標，未能夠令醫護人員累積足夠經驗。醫管局仲話，區內長者比例不斷增加，住院及門診需求將會提高，需要訂立服務優次喎。即係話，將軍澳醫院設產科既唔符合成本效益，亦唔符合優先次序，所以要煞停。

正所謂，官字兩個口。醫管局出爾反爾，完全冇口齒，都唔知邊句至係真嘅。其實，隨着將軍澳居民愈來愈多，產科服務需求亦必定會日益增加，當局推算嘅分娩數字究竟準唔準，真係令人懷疑。正如區議員話齋，將軍澳區係最多有意生育年輕夫婦嘅社區，如果可以喺區內分娩，根本不愁需求，質疑醫管局胡亂篤數，無非為推卸責任搵藉口。退一步講吖，就算區內每年真係只有二千幾宗公院分娩個案，都唔算少喇，究竟要幾多人至肯設產科呢？當局又有冇幫孕婦諗過跨區分娩舟車勞頓嘅苦處呢？

講嚟講去，始終都係資源錯配，人手不足嘅問題。醫管局話喎，如果將軍澳醫院設產科，需額外增加三十名醫生及一百二十名護士，可能會削弱其他醫院嘅服務。嗱，呢個咪就係出爾反爾嘅真正原因囉，醫管局唔諗辦法解決前線人手緊張嘅問題，一味削減服務遷就，犧牲居民利益，都好唔負責任啫。好似北大嶼山醫院及天水圍醫院，講咗N咁多年，到依家仲係無影無蹤。唉，港產官僚拖拖拉拉，你急佢哋唔急，吹脹！