行行出狀元：「紋」藝青年

紋身風氣席捲全球，成為潮流指標，影星、名模紛紛把獨特印記展示人前，香港潮人也不甘只當觀眾，樂於讓皮膚作畫紙，為身體添上色彩。美麗背後，為他們「執筆」的紋身師亦徐徐崛起，成為了年輕人趨之若鶩的至潮職業。

還以為紋身圖案只有「龍虎鳳」？這種想法未免太落伍！入行雖然只有短短兩、三年的新進紋身師Vivi與Keno，紋身槍下的作品圖案，更是包羅萬有，如中、英文字、花草樹木、動物，甚至卡通人物，也曾在客人身上活靈活現。

二人自小愛畫畫，成為紋身師的經歷也大同小異。Vivi視紋身為藝術，在外國修畢時裝設計，便決心回港當紋身師；Keno中五畢業後，雖然讀過平面及插畫設計，但感覺始終非「佢杯茶」，「呢啲雖然都係設計，但始終唔係單純畫畫，香港又無乜畫家呢類工作，於是就想做紋身師。」

頂級師傅月入逾十萬

畫畫多年，又有設計根底，但要成為紋身師，卻遠非把畫筆變成紋身槍般簡單。原來，紋身行業依然奉行師徒制，想入行便要「拜師學藝」，由低做起，經歷一段無薪的學徒生涯。Vivi試過每天洗廁所、抹枱抹地，「因為無收入，日頭要另外搵兼職做，夜晚再返舖頭。頭幾個月日日清潔打掃、畫圖、睇圖，又要睇吓師傅幫人紋身，學吓紋身步驟同點用工具。」

「大概半年後，就可以用紋身槍，試紋豬皮，熟習紋身機嘅重量、同用嘅手勢，練多幾個月，就正式紋落人度。」Vivi第一個紋身對象，是店內的一位師兄，而Keno更把自己的「第一次」，紋在自己大腿上，「第一個紋身好有紀念性，所以決定紋喺自己度。個紋身雖然唔算好靚，但當時都好有滿足感。」

技術純熟後，學徒就能「升級」，成為正式紋身師，「依家紋身講求獨一無二，所以每個紋身都要親自設計。」Keno表示，客人光顧時，紋身師會先與他詳談，再按客人要求畫出初稿，客人滿意才「落墨」，「我哋唔會亂咁滿足客人要求，例如佢要求紋男女朋友個名，我哋就會叫佢諗清楚，紋身係一世，無得後悔。」

把興趣轉化成職業固然是人生樂事，但箇中艱辛亦非外人所能理解，「一個複雜嘅紋身可能要連續紋八、九個鐘，期間要不斷彎住腰，對眼又要長期聚焦喺同一位置，真係好攰!」但看着客人滿意的笑容，一幅幅作品隨客人永久流傳，所有艱辛一掃而空。

業界估計現時全港約有三至四十間具規模的紋身店，紋身師的薪金以時薪計算，經驗愈多、技術愈好、名氣愈大，收入愈高。以本港頂級紋身師為例，月入可逾十萬，累積一定名氣及顧客更可自立門戶開舖當老闆。

入行步驟

1.向紋身師傅「拜師學藝」，當學徒學習紋身技巧。

2.以人造皮或豬皮練習，然後再找朋友或以自己作第一個「實驗品」。

3.正式成為紋身師，替客人紋身。