SUN奇古怪:Sun潮語【離罩】

有時潮語係無任何邏輯可言,但求就手又順口,你明我明,你講我又講,咁就會流行起嚟。好多潮語字面絕對同含意不符,但係大家又絕對理解佢嘅意思嗰吓有趣。其中一個例子就係「離罩」呢個潮語。如果平日遇到一啲唔合理或者過分嘅事,大家會用離譜去形容。如果想加強語氣,又或者件事真係離譜得滯,通常都會用「離晒譜」或「離晒大譜」去講。但係近年可能因為大家用厭咗,又或者可能因為香港人面對嘅離譜事情實在太多,所以開始有人用「離罩」或「離晒罩」去取代離譜。

「離罩」個罩並唔係燈罩或者眼罩。因為燈罩或者眼罩移咗位都唔係一件太值得注意嘅事。但係如果個罩係女士們出街要跟身嘅胸罩,行行吓街突然移位,仲要畀人睇到,就係一件比較矚目嘅事。重要嘅係,女性胸罩同胸部有住相依為命嘅關係,罩嘅尺寸大細當然要同胸部脗合,先會戴得到同着得舒服,兼且確保胸部得到適當保護,唔會突然露出。所以,如果一位女性無事端端,無論喺自己閨房或大庭廣眾,胸與罩突然離脫,即係「離罩」,咁就的確係一件幾離譜嘅事。

而弔詭嘅係,呢種事的確曾經發生過喺一啲女星身上。以至有陰謀論者懷疑「離罩」其實係一種博出位嘅手段,對於呢種估計,又真係唔算太離譜……。

「離罩」呢兩個字啲人講吓講吓,就變成咗離譜嘅代名詞。加強語氣嘅話,亦可以用「離晒罩」去形容難以接受嘅事。

第一手消息請下載on.cc東方互動iPhone/iPad/Android/Windows Phone Apps

廣告人、網台主持 阿東