政壇：搞搞政：廖潔明做神探解構奇案
紀律部隊人員退休後有乜好路數？做番同保安有關嘅工作，或者從政都係好多人嘅選擇，近期就有唔少人都進身娛樂圈，繼廉政公署執行處前副處長徐家傑最近喺一部電影中客串扮番廉署阿Sir，警務督察協會前主席廖潔明嚟緊亦會擔任某電視台嘅節目主持，一於神探上身，講解香港歷年來發生過嘅多宗轟動碎屍案。
呢個廖Sir有份主持嘅節目搜羅嘅大案包括「康怡花園烹夫案」、「Hello Kitty頭藏屍案」、「援交少女碎屍案」等，單單都怵目驚心！廖Sir透露佢會聯同另外幾位主持，解構警方喺調查呢幾單大案時遇到乜嘢困難、如何抽絲剝繭、最終成功破案及緝兇嘅關鍵等。
廖潔明早前以新工作須保持政治中立為由退出新民黨，問佢點解講碎屍案都要政治中立，佢就話其實今次主持節目只係兼職，嚟緊份正職仲未公布得住喎。
設計圖片