政壇：吳克儉：冇頭髮都可飛髮
政府尋日喺柴灣青年廣場搞咗個青年高峰會議，高官空群出動，多名局長更大講佢哋嘅年輕人觀點，譬如運輸及房屋局局長張炳良同發展局局長陳茂波齊推銷唔使咁早諗買樓；教育局局長吳克儉就指導年輕人「飛髮」都可以致富，佢哋齊噴廢話，年輕人啱唔啱聽就好難講。
張炳良話自己讀大學時淨係喺圖書館「烚下烚下」，根本冇諗過買樓。陳茂波亦話，年輕人要諗、要規劃嘅唔係置業，而係事業。最廢嘅要數吳克儉，佢建議青年人可以針對香港人口老化，學吓點樣幫啲冇乜頭髮嘅長者「飛髮」致富，話「行行出狀元」︰「理髮有好多種，有同明星剪髮、同長者剪髮，有啲有錢嘅冇頭髮，都可以飛髮o架，收好多錢o架！」
吳克儉（右）教精青年人：冇頭髮都要飛髮o架！