政壇：亞視大龍鳳招呼 一網民

免費電視牌照增發問題引起各方角力，與亞洲電視關係密切嘅亞洲會早前搞咗反發牌「爛騷」後，網民大表不滿，其中曾慶光（光仔）就發起尋日「包圍亞視行動」，亞視都如臨大敵迎戰踩場者，出動近百名藝人同職員喺總部門口再做咗場騷。不過，亞視搞場大龍鳳，最終只係得一個男網民到場示威，似乎網民連去示威都覺費事，認真悲哀。

亞視早前喺政府總部搞咗「關注香港未來」反發牌騷，其後不斷多次重播，令通訊事務管理局收到過千宗投訴。尋日有廿幾個記者到場採訪「包圍亞視行動」，當孤身撐行動嘅光仔喺亞視大門外同記者講嘢時，亞視執行董事盛品儒就率領一眾藝員及職員操出大門口，仲搵幾個着住粉紅色貼身「戰衣」嘅準亞姐，齊齊舉「否決」牌，除大唱佢哋首台歌，有人仲不停用個「否決」牌遮擋光仔塊臉。光仔亦不甘示弱，眼見亞視員工表演「江南style」，佢就即時喺閘外呼應，邊跳邊唱：「亞視執笠吧！政府發牌啦！」嘅「亞視style」還擊。

盛品儒話，城市電訊主席王維基拍咗幾套劇就想要個免費牌照係荒謬，其家族喺亞視投資咗十幾億，王維基投資兩億幾就想同佢惡性競爭，係好唔公平，仲話王維基攞晒亞視啲商業機密資料離開。不過，王維基隨即發聲明回應盛品儒嘅指控，強調離開亞視時絕對冇帶走任何資料。