政壇:雙宗諗計反擊長毛

當局建議向合資格長者每月派發二千二百元嘅長者生活津貼,但係撥款案由新一屆立法會開工就提交財委會審議,家吓一拖成個月都過唔到,初初阻撓撥款嘅工聯會、白鴿黨、公文袋近期都因為民間壓力太大,唔敢再參與拉布,剩低社民連嘅長毛梁國雄繼續玩。尋日勞工及福利局局長張建宗同建仔主席譚耀宗不約而同將長津表決唔到嘅矛頭對準長毛,一個講長者需要,一個講議事規則,無非想腰斬長毛嘅拉布動議,等長津早日過關。

長者等得好心急

張建宗尋日回應前晚財委會會議又畀拉布戰嘥咗時間,佢否認政府企得太硬,又話長津計劃喺立法會前前後後傾咗二十個鐘頭,已經好清晰,依家過唔到撥款,「純粹有個別議員拖延」、「純粹是立法會財委會的程序運作問題」,佢仲話已經要求財委會下星期五嘅會議有三節共六小時,希望一次過處理剩低嘅問題。佢又強調,長者已經等得好心急,尤其係嗰啲生活比較貧困者,希望財委會早開綠燈。

前日財委會會議上,工聯會嘅王國興建議剪布,建仔嘅譚耀宗尋日都話,長毛喺財委會會議上無休止提出動議,辯論根本唔知幾時先完結,最重要嘅係,由於財委會嘅議事規則有漏洞,議員可以毋須事先通知便提出修訂議案,並且內容同次數都冇限制。換言之,只要議會中有人想阻撓,就可以無止境咁忽然喺會上提出動議,如果長毛要玩落去,財委會再加多二十個鐘嘅會議時間都未必可表決撥款。所以佢力撐黨友提出就每議題限制動議嘅建議,可惜呢個動議一樣陷入拉布嘅泥沼中。

第一手消息請下載on.cc東方互動iPhone/iPad/Android/Windows Phone Apps

設計圖片及對白