包公淪為包貪官 香港何處覓青天

紙包唔住火，煲呔曾爵士貪腐醜聞愈揭愈多，愈揭愈臭，簡直令人目不暇給，嘆為觀止。

嗱，有因至有果，講起煲呔曾嘅貪腐醜聞，就不能不提轟動港澳嘅歐文龍八億世紀巨貪案。大家咪以為呢單案已經完結，其實仲有好多內幕未曝光o架，東方報業集團接獲消息，歐文龍案愈查愈大鑊，五名牽涉其中嘅香港富商仍然逍遙法外，睇怕好戲仲喺後頭。

最好笑嘅係，歐文龍案啱啱曝光嘅時候，煲呔曾仲以為係澳門嘅事，同自己無關，所以急急向北京匯報邀功。點知香港廉政公署不查猶自可，一查竟發現該案清洗黑錢嘅情節大部分喺香港進行，香港富商劉鑾雄及羅傑承亦捲入其中，其後仲被澳門控以行賄及清洗黑錢罪添。呢個時候煲呔曾先至識驚，為咗防止呢把火燒到自己及其利益集團身上，惟有諗計撲火，搵「自己友」湯顯明出任廉政專員，全程（目及）實案件進展。講到呢度，大家終於明白點解○九年湯顯明已屆退休之齡，貪曾仲要鬼鬼祟祟延長佢多三年任期，而且贈予金紫荊星章添。

唔到你唔服，湯顯明上任後，歐文龍案果然再無任何進展，連廉署調查貪曾單畸士亦無聲無息，如果話唔係官官相衞玩包庇，你信唔信吖？貪曾貪腐鐵證如山，居然查來查去都冇下文，究竟係刑不上大夫，定係有難言之隱呢？唔好話畀大家聽，香港包青天已淪為同流合污嘅「包貪官」呀。講起都好笑，廉署成日宣傳「香港勝在有ICAC」，好似好英明神武咁，原來係吹水唔抹嘴。

正如立法會議員及學者話齋，貪曾案拖咗十個月，廉署查成點、查到邊、點樣查，必須向公眾交代，如果無法解釋清楚，就有護短包庇之嫌，立法會應該引用特權法徹查。

冇錯嘞，如果廉署受壓唔可以秉公辦事咯喎，咁咪交畀立法會調查囉，不過以後就唔好再吹水「香港勝在有ICAC」喇。嗱，新任廉政專員白韞六，你有兩個選擇，一係向市民公開交代調查貪曾案嘅進展，一係自動消失，無謂拖泥帶水，影響廉署聲譽事小，破壞香港核心價值事大呀！

嗱嗱嗱，中共新領導人習近平都講啦，唔解決貪腐問題，必定會亡黨亡國。北大人誓言反貪，係咪講到做到姑且不論，但起碼顯示咗決心。試諗吓，如果內地反貪，香港護貪，咁仲成世界嘅，到時唔使外部勢力干預，香港都自己玩完喇，叮！