SUN微博：打橫嚟講：亞視亞視我頂硬你！
在此，敢說，有史以來，全球最成功的免收費電視台，肯定是今日香港特區內的亞洲電視台。
一所電視台，除資訊傳播外，最重要的責任，係提供當地人消遣的娛樂！
大家看看，全球幾時有過好似今日亞視提供的娛樂節目，能令人類睇得血脈沸騰、咬牙切齒，甚或笑足幾日的呢？我敢說，今日的無綫，絕無這個能耐！
仲有呀！亞視的絕活，不是有錢、有人就做得來的。嗱！無綫台慶夜的特備直播節目，淨係布景板上的燈泡費用，足夠亞視全日開支了，所以，如斯金碧輝煌，加台前幕後大卡士大陣仗製作出嚟嘅收視，無五十點，也算失敗囉！反觀，亞視的「乜生」選舉，騎騎呢呢的柴娃娃，好過大口環同學會少少之嘛！只有幾件不知名，但「事業線」深度怒爆的小艷彈出嚟搖曳吓，便支撐咗一晚咯！除了香港鄰近地區鄉鎮收視高企外，還日日可以喺自家台連續重播又重播再重播亦重播仲重播，不知幾自豪。
講到自豪，還是亞視比無綫高得多，淨係「亞生」之嘛！就成日登上娛樂頭版，成班「亞生」大陸仔，逾期在港非法逗留，畀警方拘控，涉做黑工，哈哈！
當有人大叫亞視早抖，要佢執笠，我就在此撐佢哋，香港一定要有亞視，尤其那位義工王征先生，佢舞姿迷人呀！邵逸夫同利孝和夫人一定做唔到咁娛樂性嘅大事！
次文化考古學家，對城中潮語有深入研究，博徵博引，廢官廢人行埋一邊。
email：sunweibo@opg.com.hk
