政壇：政商定格：銀行家黃遠輝變身樓神
資深銀行家Stanley黃遠輝退休後生活寫意，今年九月佢仲重返校園，讀比較及公眾歷史，包括九七前後嘅香港房屋政策，加上依家有城規會同房委會公職在身，多咗評論同探討房屋政策，有時都會因利乘便，喺公開場合分享吓睇法，反而少咗睇銀行界嘅事。
依家樓市、房屋、土地供應呢幾瓣都咁熱鬧，Stanley「轉型」真係十分合時，佢一向都好肯同大家分享佢嘅睇法，睇嚟以後大家多個「樓神」可以問意見。
喺銀行業打滾多年，佢習慣咗一早起身，但為咗就返學時間，以前星期六打Golf、星期日耕作嘅習慣，依家就改為星期六朝早耕作完，就下晝返學。講到耕作，佢大讚近排收成嘅粟米好甜，話另外種緊椰菜同蘿蔔添，希望繼續豐收啦！
黃遠輝重返校園讀比較及公眾歷史。（資料圖片）