政壇：搞搞政：胡志偉暗踩一舊雲
白鴿黨下個月選新主席，接替因立法會選舉大敗而引咎下台嘅何俊仁。喺蜀中無大將下，就想搵「乳鴿」頂上，而兩名立會新丁黃碧雲同胡志偉，都被視為問鼎新主席嘅人選。之不過，黃碧雲上位後講錯嘢、投錯票，被嘲為「一舊雲」，幾單嘢加埋，想再捧佢做主席已冇乜可能。
胡志偉尋日就話因要搞好九龍東地區工作，如果做埋黨主席，擔心會顧此失彼，希望畀兩年時間等九東工作有啲成績先接主席一職。佢又話白鴿友開會都有講起一舊雲，睇嚟大家都有啲意見。佢話，咁樣正好反映作為新人言語會唔夠成熟、言語間會有啲唔準確嘅表達，所以自己都要小心啲。
唔知一舊雲係咪畀胡志偉踩親條尾，就自己死死氣話暫時唔考慮今屆做主席，因為做得主席就要有心理準備被注視，所以最好副主席都唔好預佢，又話作為新丁都係要喺地區摸索吓喎！
設計圖片及對白