政壇：湯恩佳怨貪曾得把口
孔教學院院長湯恩佳尋日出席一個粵劇宣傳活動時，話唔少國家同地區都已經將孔誕定為教師節或慶祝節日，而自己多年來促請「貪曾」煲呔曾落實孔誕假期，但對方一味採「拖字訣」，企圖淡化件事，即係同對住幅牆講嘢冇分別喇。佢仲話：「佢（指貪曾）係虔誠天主教徒嘛，只信佢心目中嗰個神，根本就冇心推動孔誕！」
湯恩佳坦言特首CY梁振英對於孔誕假期嘅態度就積極好多，依家佢將希望寄託晒喺CY身上，稍後會聯同十幾個政界人士一同邀請CY詳細傾傾，相信不久將來就有好消息。
佢首倡嘅孔教粵劇《孔子之周遊列國》，今年二月首次全球公演後反應熱烈，嚟緊喺下月將再接再厲，一連兩天於葵青劇院演出。尋日該院同步推出該劇嘅劇本，未來於全港大中小學各派發一本，向青少年推廣孔教粵劇。
