政壇：工總青委訪台睇廠取經
自創品牌唔容易，工業總會青委一班工業界第二代，早前就組團去台灣參觀三間成功衝出亞洲嘅台資企業，包括手機、電腦同單車廠。
工總前主席孫啓烈大仔兼青委主席Eric孫榮聰負責帶隊，團友仲有工總副主席劉展灝大仔Gary劉燊濤同德國寶董事長陳國民大女陳嘉賢兩位青委副主席，共三十幾人浩蕩出發。
Eric話青委成員家族多數喺內地設廠，再安排參觀內地廠房意義唔大，所以今次特登去台灣睇廠，結果收穫豐富。佢印象最深刻嘅係台資企業打造品牌融入當地文化及價值觀，例如今次參觀台灣最大嘅單車廠捷安特（Giant），佢哋將踩單車包裝成為追求健康生活嘅新時尚，又帶動單車環島遊等人氣活動，令單車順理成章融入民眾生活，難怪銷量居高不下。
工總青委三位靈魂人物帶隊訪台，左起：劉燊濤、孫榮聰及陳嘉賢。（受訪者提供）